ਹਿੱਕਾਂ ਤਾਣਕੇ ਖੜ ਜਾਨੇਂ ਆਂ

ਗ਼ਜ਼ਲ 

ਹਿੱਕਾਂ ਤਾਣਕੇ  ਖੜ  ਜਾਨੇਂ ਆਂ  
ਹੱਕ਼  ਦੀ  ਗੱਲ ਤੇ ਅੜ  ਜਾਨੇਂ ਆਂ 

ਬਣਦੇ ਕੁੱਝ ਨਈਂ  ਘੁੰਮਦੇ ਆਂ ਬਸ 
ਮੁੜ -ਮੁੜ ਚਾਕ  ਤੇ ਚੜ ਜਾਨੇਂ ਆਂ 

ਇੱਕ ਦਿਨ ਬੋਲ ਪਵੇ ਉਹ ਸ਼ਾਇਦ 
ਨੇੜੇ ਹੋ ਕੇ ਖੜ ਜਾਨੇਂ ਆਂ 

ਦੁੱਖਾਂ -ਦਰਦਾਂ ਦੇ ਇਹ ਟਿੱਲੇ 

ਹੱਸਦੇ -ਰੋਂਦੇ ਚੜ ਜਾਨੇਂ ਆਂ 

ਅਪਣੇ ਨਾਲ ਨੀਂ ਘੁਲਿਆ ਜਾਂਦਾ 
ਲੋਕਾਂ ਨਾਲ ਤਾਂ ਲੜ ਜਾਨੇਂ ਆਂ 

• 
  

Ghazal-2-ਅੱਖਾਂ ਦੇ ਵਿੱਚ ਹੰਝੂ ਭਰਕੇ

 

ਗ਼ਜ਼ਲ 
ਅੱਖਾਂ ਦੇ ਵਿੱਚ  ਹੰਝੂ  ਭਰਕੇ
ਹੁਣ ਨ੍ਹੀਂ  ਰੋਣਾ ਚੇਤੇ ਕਰਕੇ
 
ਜਾਚ ਆਈ ਹੈ ਹੌਲੀ-ਹੌਲੀ
ਜੀਣਾ ਸਿੱਖ ਲਿਆ ਮਰ -ਮਰਕੇ
 
ਅੱਖਾਂ ਦੇ ਵਿੱਚ ਫੁੱਲ ਉਗਾਏ
ਝੋਲੀ ਦੇ ਵਿੱਚ ਕੰਡੇ ਭਰਕੇ
 
ਸਬ ਨੂੰ ਖ਼ੁਸ਼  ਰੱਖਣ ਦੀ ਆਦਤ
 ਉਮਰ ਗੁਜ਼ਾਰੀ ਹੈ ਡਰ -ਡਰਕੇ
 
ਅਸੀਂ ਪਿਆਸੇ ਕਿਓਂ ਰਹਿਨੇ ਆਂ
ਤੇਰੇ ਦਰ ਦਾ ਪਾਣੀ ਭਰਕੇ

satpal khayaal

Ghazal-1-ਹੌਲੀ ਹੌਲੀ ਇੱਕ -ਇੱਕ ਕਰਕੇ ਹਰ ਇੱਕ ਪੱਤਰ ਸੁੱਕ ਜਾਂਦਾ ਏ

 

ਹੌਲੀ ਹੌਲੀ ਇੱਕ  -ਇੱਕ ਕਰਕੇ ਹਰ ਇੱਕ ਪੱਤਰ ਸੁੱਕ ਜਾਂਦਾ ਏ

ਰੁੱਖਾਂ ਵਾਂਗੂੰ ਇੱਕ  ਦਿਨ ਬੰਦਾ ਮੁੱਕਦੇ  ਮੁੱਕਦੇ  ਮੁੱਕ  ਜਾਂਦਾ ਏ

 

ਅੱਖਾਂ ਤੇ ਮੈਂ ਸਬਰਾਂ ਦੇ ਬੰਨ ਇਹਨੇ ਪੱਕੇ ਕਰ ਦਿਤੇ ਨੇ

ਹੰਝੂਆਂ ਦਾ ਹੜ੍ਹ  ਅੱਖਾਂ ਤੀਕਰ ਆਂਦੇ  ਆਂਦੇ ਰੁੱਕ  ਜਾਂਦਾ ਏ

 

ਪਿਓ ਦੀ ਭਾਰੀ ਪੱਗ ਜਦ ਪੁੱਤ ਦੇ ਸਿਰ ਦੇ ਉੱਤੇ ਵੱਝ ਜਾਂਦੀ ਹੈ

ਜਿੰਮੇਵਾਰੀ ਪੈ ਜਾਂਦੀ , ਸਿਰ  ਝੁੱਕਦੇ -ਝੁੱਕਦੇ ਝੁੱਕ ਜਾਂਦਾ ਏ

 

ਔਖੇ ਵੇਲੇ ,ਤੰਗ ਕਮਾਈਆਂ , ਤਾਹਨੇ -ਮਿਹਣੇ ਇਸ ਦੁਨੀਆਂ ਦੇ

ਟੁੱਕ ਰੋਟੀ ਚਲਣ ਦਾ ਝੋਰਾ ਹਾਸੇ -ਖੁਸ਼ੀਆਂ ਟੁੱਕ ਜਾਂਦਾ ਏ

 

ਰੱਖੋ ਥੋੜੀ ਅਣਖ ਅਨਾ, ਝੁੱਕ -ਝੁੱਕ ਕੇ ਸਲਾਮਾਂ ਕਿਓਂ ਕਰਦੇ ਓ

ਜਿਸ ਦਿਨ ਵੰਦਾ ਝੁੱਕ ਜਾਂਦਾ ਏ , ਉਸ ਦਿਨ ਵੰਦਾ ਮੁੱਕ ਜਾਂਦਾ ਏ

Shayar Satpal Khayaal